اسلام آباد: یوتھ کونسل پاکستان نے راجہ نجابت حسین کو انسانی حقوق اور تنازعات بالخصوص کشمیر کاز کے لیے دہائیوں کی طویل خدمات کے اعتراف میں لائف ٹائم اچیومنٹ ایوارڈ سے نوازا۔ راجہ نجابت حسین ستارہ پاکستان کے صدارتی ایوارڈ یافتہ ہیں۔ وہ جموں و کشمیر تحریک حق خودارادیت انٹرنیشنل کے چیئرمین بھی ہیں۔ یوتھ کونسل پاکستان نے ذیشان عارف یوتھ چیئرمین JKSDMI UK کو ایمرجنگ ینگ لیڈر ایوارڈ سے نوازا۔ محمد شہزاد خان صدر یوتھ کونسل پاکستان نے راجہ نجابت حسین اور ذیشان عارف کو بالترتیب لائف ٹائم اچیومنٹ ایوارڈ اور ایمرجنگ ینگ لیڈر ایوارڈ پیش کیے۔
راجہ نجابت حسین نے اپنے اعزاز میں منعقدہ ناشتے کے استقبالیہ کے شرکاء سے بھی خطاب کیا۔ انہوں نے پاکستان کے نوجوانوں پر زور دیا کہ وہ ایک ذمہ دار شہری بن کر قومی یکجہتی کے لیے کام کریں۔ انہوں نے مزید کہا کہ پاکستان کو ترقی یافتہ اور خوشحال ریاست بنانے میں نوجوانوں کا کردار انتہائی اہم ہے۔ راجہ نجابت حسین نے نوجوانوں پر زور دیا کہ وہ پاکستان اور اس کی فوج کے ساتھ کھڑے ہو کیونکہ پاک فوج نے ہماری خوبصورت سرزمین کے لیے بہت قربانیاں دی ہیں۔
اس موقع پر ذیشان عارف یوتھ چیئرمین JKSDMI UK نے انٹرنیشنل اسٹوڈنٹ سوسائٹی کے آغاز کا اعلان کیا جس کے چیپٹرز آزاد جموں و کشمیر، اسلام آباد اور پاکستان کے تمام حصوں میں ہوں گے اور اس کا ہیڈ آفس یو کے میں ہوگا۔ یہ سوسائٹی طلبہ کے تھنک ٹینک کے طور پر کام کرے گی۔ اس سے طلباء کو اپنی تعلیمی مہارتوں پر عمل کرنے اور قومی، علاقائی اور بین الاقوامی مسائل پر کام کرنے کا ایک پلیٹ فارم ملے گا۔
سیکرٹری انسانی حقوق یوتھ کونسل پاکستان عادل خان، کیمپس ہیڈ یوتھ کونسل پاکستان بحریہ یونیورسٹی اسلام آباد افشاء ایوب اور اسلام آباد اور راولپنڈی کی مختلف یونیورسٹیوں سے یوتھ کونسل پاکستان کے ممبران نے راجہ نجابت حسین ستارہ پاکستان چیئرمین جموں و کشمیر تحریک حق خودرادیت انٹرنیشنل کو خراج تحسین پیش کرنے کے لیے سیشن میں شرکت کی۔
واپس کریں