کل جماعتی حریت کانفرنس (اے پی ایچ سی) کے سینئر رہنما میر واعظ عمر فاروق نے اپنے سیاسی نظریے میں تبدیلی کے بارے میں ایجنسیوں کے کہنے پر بھارتی میڈیا میں پھیلائی جانے والی افواہوں کی سختی سے تردید کی ہے۔
میر واعظ عمر فاروق، جو اگست 2019 سے اپنی سری نگر کی رہائش گاہ پر نظر بند ہیں، نے ایک بیان میں کہا کہ جموں سے تعلق رکھنے والے کچھ اخبارات ان کی اور سری نگر کے ایک سابق ڈپٹی میئر کے درمیان ملاقات اور نام نہاد "مین اسٹریم سیاست" میں شامل ہونے کی جھوٹی خبریں دے رہے ہیں۔

اے پی ایچ سی کے رہنما نے رپورٹس کو بدنیتی پر مبنی پروپیگنڈہ اور انہیں بدنام کرنے کی دانستہ کوشش قرار دیا۔ انہوں نے لوگوں پر زور دیا کہ وہ اس مکروہ پروپیگنڈہ اور جھوٹ سے چوکس رہیں جو بھارتی میڈیا میں ناپاک اور بے ایمان عناصر کی طرف سے پھیلائے جا رہے ہیں۔

میر واعظ عمر فاروق نے کہا کہ وہ اپنے سیاسی عقائد اور نظریات کی وجہ سے گزشتہ تین سالوں سے بغیر کسی الزام کے قید و بند کی صعوبتیں جھیل رہے ہیں۔ انہوں نے واضح کیا کہ وہ حریت کے اس عزم پر قائم ہیں کہ جموں و کشمیر ایک بین الاقوامی سطح پر تسلیم شدہ تنازعہ ہے جسے کشمیری عوام کی امنگوں کے مطابق پرامن اور منصفانہ طریقے سے تمام فریقین کے درمیان بات چیت کے ذریعے حل کیا جانا ہے۔
واپس کریں