دل بعض و حسد سے رنجور نہ کر
یہ نور خدا ہے اس سے بے نور نہ کر
بھارت کے غیر قانونی طور پر مقبوضہ جموں و کشمیر میں کل جماعتی حریت کانفرنس کے رہنماؤں نے کہا ہے کہ کشمیری شہداء کی قربانیوں کو رائیگاں نہیں جانے دیا جائے گا اور جاری تحریک آزادی کو ہر قیمت پر منطقی انجام تک پہنچایا جائے گا۔رہنما سری نگر کے علاقے بچ پورہ میں اے پی ایچ سی کے شہید رہنما الطاف احمد شاہ کی رہائش گاہ پر سوگواروں سے خطاب کر رہے تھے جو پیر کی شب بھارتی قید میں انتقال کر گئے تھے۔ انہوں نے کہا کہ کشمیری شہداء نے اپنے خون سے جاری تحریک آزادی کو پروان چڑھایا ہے اور بھارت اپنے تمام تر وسائل ضائع کرنے اور ہر وحشیانہ حربہ استعمال کرنے کے باوجود اسے دبانے میں ناکام رہا ہے۔ عبدالاحد پارہ، بلال احمد صدیقی، شبیر احمد ڈار اور خواجہ فردوس سمیت رہنماؤں نے بچ پورہ کا دورہ کیا اور سوگوار خاندان سے اظہار یکجہتی کیا۔دریں اثناء شہید الطاف احمد شاہ کی غائبانہ نماز جنازہ نئی دہلی کی بدنام زمانہ تہاڑ جیل میں ادا کی گئی۔ جولائی 2017 سے لے کر گزشتہ ہفتے ہسپتال منتقل ہونے تک غیر قانونی طور پر نظر بند رہا۔ نماز جنازہ میں اے پی ایچ سی کے چیئرمین مسرت عالم بٹ اور دیگر نظر بند حریت رہنماؤں بشمول شبیر احمد شاہ، محمد یاسین ملک، نعیم احمد خان اور دیگر قیدیوں کی بڑی تعداد نے شرکت کی۔ انہوں نے شہید قائد کو جاری جدوجہد آزادی میں ان کے کردار اور قربانیوں پر بھرپور خراج عقیدت پیش کیا۔