امریکی صدر ٹرمپ نے پارلیمنٹ سے خطاب میں امریکہ کو مطلوب ہائی پروفائل دہشت گرد کی گرفتاری میں پاکستان کے کردار کو سراہا۔ امریکہ سمیت پوری دنیا بالخصوص پاکستانیوں کے لئے بھی یہ حیران کن خبر تھی۔ امریکی صدر کے انکشاف پر حسب روایت طرفین سے ردعمل، تبصرے تجزیئے کئے گئے۔ پاکستانی وزیراعظم شہباز شریف نے ردعمل دیتے ہوئے ٹرمپ کی جانب سے انسداد دہشتگردی کی کوششوں میں پاکستان کے کردار اور حمایت کو تسلیم کرنے اور اور سراہنے پر ٹرمپ کا شکریہ ادا کیا اور ساتھ ہی ساتھ انسداد دہشتگردی کے حوالہ سے پاکستان کے عزم و جدوجہد اور قربانیوں کا تذکرہ بھی کیا۔ یاد رہے امریکی صدارتی انتخاب سے پہلے اور ٹرمپ کے پارلیمنٹ خطاب سے چند لمحے پہلے تک تحریک انصاف کے حامیوں کے نزدیک ٹرمپ اک تازہ ہوا کے جھونکے کی مانند تھے۔ انکے نزدیک ٹرمپ انکے لیڈر عمران خان کے انتہائی قریبی دوست ہیں اورپوری دنیا میں ٹرمپ ہی ایسی واحد شخصیت ہیں جو عمران خان کوقید و بند کی صعوبتوں سے نکال باہر کریں گے۔
تحریک انصاف کے حامی صحافیوں، اینکرز اور یوٹیوبرز نے گلے پھاڑ پھاڑ کر یہ دعوے کئے تھے کہ ٹرمپ صدارتی عہدہ سنبھالتے ہی اپنے پہلے خطاب میں پاکستانی حکومت کو عمران خان کی رہائی کے لئے حکم نامہ جاری فرمائیں گے۔ یہی وجہ تھی کہ امریکہ میں مقیم تحریک انصاف کے حامیوں نے ٹرمپ کی انتخابی مہم میں بڑھ چڑھ کر حصہ لیا۔ دوسری جانب انکے سیاسی حریف مسلم لیگ ن و پیپلز پارٹی کے حمایتی افراد نے ٹرمپ کی مخالفت میں ووٹ کاسٹ کئے۔ جب پی ٹی آئی حامیوں کو یہ طعنہ دیا جاتا کہ آپ کل تک امریکہ مردہ باد اور ایبسلوٹلی ناٹ کے نعرے بلند کرتے تھے اور آج انہی امریکی حکام سے اُمیدیں وابستہ کیوں کر رہے ہیں تو انکا سادہ ساجواب ہوتا تھا کہ عمران خان کو امریکہ نے اقتدار سے باہر کیا ہے اب امریکہ ہی خان صاحب کو واپس اقتدار میں لائیں گے۔ یعنی ایک طرف نام نہاد امریکی مداخلت مردہ باد دوسری جانب امریکی مداخلت زندہ باد۔ یہ بات کسی سے ڈھکی چھپی نہیں رہی کہ پی ٹی آئی قیادت نے جس طرز پر ٹرمپ کی انتخابی مہم چلائی اور ٹرمپ کے حامی سیاستدانوں سے عمران خان کے حق میں ٹویٹ کروائے اور پھر جس طرز پر سوشل میڈیا اور الیکٹرانک میڈیا پر ان بیانات کا بیانیہ بنایا کہ کسی بھی وقت ٹرمپ بہادر صدر زرداری یا وزیراعظم شہباز شریف کو فون کرے گا اور حکومت کو اڈیالہ جیل کے دروازے کھول کر عمران خان کو پھولوں کے ہار پہنا کر رہاکرناپڑے گا۔ یقینی طور پر پاکستانی حکومت شدید دباؤ اور سہمی سہمی نظر آرہی تھی۔
امریکی پارلیمنٹ سے ٹرمپ کے خطاب نے 180زاویہ سے معروضی حالات بدل کر رکھ دیئے ہیں۔ اس وقت مسلم لیگ ن کے حامی خوشی کے شادیانے بجاتے ہوئے لڈیاں اور دھمالیں ڈالتے دیکھائی دے رہے ہیں بالکل ایسے ہی جس طرح عمران خان اور ٹرمپ کی ملاقات کے بعد تحریک انصاف کے حامیوں نے نچ نچ کے گھنگڑوں توڑ ڈالے تھے۔ ٹرمپ خطاب کے بعد تحریک انصاف کے حامی یوٹرن مارتے ہوئے ٹرمپ کوگالیوں سے نوازتے دیکھائی دے رہے ہیں۔ میں یہ بات پورے یقین سے کہہ سکتا ہوں کہ آج اگر ٹرمپ سرکار عمران خان کے حق میں چھوٹا سا بیان جاری کردے تو طرفین کی سیاسی جماعتوں نے 180 ڈگری زاویہ کے یوٹرن مارلینے ہیں۔ مسلم لیگ ن نے اسے اندرونی معاملات میں مداخلت قرار دینا ہے جبکہ پی ٹی آئی نے امریکہ کو انسانی حقوق کا سب سے بڑا علمبردار قرار دے دینا ہے اور ٹرمپ کو نوبل پرائز کے لئے نامزد کرنے کے لئے مہم چلادینی ہے۔
کل تک پی ٹی آئی حامیوں کو ٹرمپ اپنا اپنا لگتا تھااور آج مسلم لیگ ن والوں کیلئے ٹرمپ میرا جگر میرا جانی بن چکا ہے۔ بدقسمتی سے ہم پاکستانی احساس کمتری کا شکار ہیں اور کیوں نہ ہوں جب پاکستانیوں کی معیشت کا دارومداد ہی امریکہ، یورپ اور مالیاتی اداروں کی مرہون منت ہے۔ ویسے ہم پاکستانی بھی کتنے خودغرض ہیں کہ امریکہ مردہ باد نعرہ بھی لگاتے ہیں اور امریکی ویزہ حصول کے لئے اپنا تن من دھن لٹانے میں دریغ بھی نہیں کرتے۔ ہم پاکستانی یو ایس ایڈ سے اربوں روپیہ بھی ڈکارلیتے ہیں اورامریکہ مردہ باد کا نعرہ بھی جوش و خروش سے مارلیتے ہیں۔ ہم پاکستانی دنیائے اسلام اور بالخصوص پاکستان کے تمام مسائل کا ذمہ دار امریکہ بہادر کو قرار دیتے ہیں لیکن آج اگر امریکی ریاست ویزہ لاٹری کے ذریعہ ایک کروڑ افراد کوامریکی شہریت دینے کا اعلان کردے تو 25 کروڑ پاکستانیوں میں کوئی ایسا نہ ہوگا جو امریکی ویزہ حصول کے لئے ویزہ لاٹری میں اپنے نام کا اندراج نہ کروائے۔
ہم پاکستانیوں کو یہ بات ہمیشہ ذہن نشین رکھنی چاہیے کہ امریکہ بہادر کوریاست پاکستان یاکسی پاکستانی فرد سے کوئی سروکار نہیں۔ انکے نزدیک صرف اور صرف امریکی مفاد عزیز ہے۔ امریکہ کو اپنا مفاد عزیز ہوتو انکے لئے غیر منتخب غیر جمہوری ایوب خان، ضیاء الحق،پرویز مشرف بھی بہت عزیز ہوتے ہیں لیکن انکے مفاد کے برخلاف چلنے والے منتخب نمائندے ذوالفقار علی بھٹو، بے نظیر بھٹو، نواز شریف اور عمران خان کسی صورت پسندیدہ نہیں ہوسکتے۔ بہرحال آج کے معروضی حالات میں ہم پاکستانیوں کو اپنا اپنا ٹرمپ عزیز ہے جوانکے حق اور مفاد میں بیان جاری کردے۔
واپس کریں