گذشتہ چند ایام سے عجیب و غریب خبریں دیکھنے، سننے کو مل رہی ہیں۔ سوچا آج اپنے قلم کی نوک سے ان خبروں پر تبصرہ کیا جائے۔ گذشتہ دنوں پاکستان کے مرکزی دھارے کے تمام اخبارات میں 50 سے زائد صفحات پر مشتمل مریم سرکار کی جانب سے دیئے گئے اشتہارات نے پوری پاکستانی قوم کی توجہ حاصل کی۔ چاہتے اور نہ چاہتے ہوئے طرفین کی جانب سے اشتہارات دیکھے گئے۔ کہیں پر تعریفوں کے پُل باندھے گئے تو کہیں آگ کے گولے برسائے گئے۔ یاد رہے سال 2021 میں بزدار سرکار کی جانب سے ایسے ہی اشتہا رات نما اخبارات جو تقریبا 40 صفحات پر مشتمل تھے شائع ہوئے تو راقم نے بزدار سرکار کو حرف تنقید بناتے ہوئے تحریک انصاف کے حامیوں کے سامنے یہ سوال اُٹھایا کہ ان اشتہارات پر کس کس پاکستانی کا پیسہ خرچ ہوا ہے؟ اس وقت تحریک انصاف کے حامی توجیحات پیش کرتے تھے جبکہ انکے حریف مسلم لیگ ن کے حامی عمران و بزدار سرکار پر دل کھول کر بھڑاس نکالتے تھے۔ اور آج صورتحال 180 زاویہ پر دیکھائی دے رہی ہے جہاں پی ٹی آئی حامی دل کھول کر مریم سرکار پر تنقید کے نشتر برسا رہے ہیں تو مسلم لیگ ن کے حامی عین اپنے حریفوں کی طرح مریم سرکار کے اشتہارات کا دفاع کررہے ہیں۔ آج اس موقع پر بندہ ناچیز کو پاکستانی و بھارتی اداکاروں کی مشترکہ پیشکش ''چل میرا پُت'' میں کامیڈین اکرم اُداس کا ڈائیلاگ '' فیر کہندے نے بوٹا گالاں کڈا دا اے'' شدت سے یاد آیا۔ ویسے اس موقع پر آپ کو بھی اکرام اُداس کا ڈائیلاگ ذہن میں آیا تو ضرور ہوگا؟ سوشل میڈیا کے اس دور میں کروڑوں اربوں روپے کے اشتہارات کی بجائے یہی رقم کسی فلاحی منصوبے پر نہیں لگانی چاہیے؟ یاد رہے اگر آپ کام کررہے ہیں تو آپکا کام خودبخود دیکھائی دے گا جیسا کہ صفائی ستھائی پروگرام پرصوبہ پنجاب کے تقریبا 70فیصد شہری حکومتِ وقت کو داد دے رہے ہیں۔ وگرنہ اربوں روپے کے اشتہارات لگانے سے نہ تو آپ صحیح معنوں میں اپنی کارکردگی دیکھا سکتے ہیں اور نہ ہی حریف جماعت کے حامیوں کے دل جیت سکتے ہیں۔
پچھلے ہفتے وفاقی کابینہ میں اضافہ دیکھنے کو ملا جس میں چُن چُن کرنگینے بھرتی کئے گئے۔ جہاں ایک طرف پاکستانی سیاسی و غیر سیاسی قیادت کریہ کریہ نگر نگر جاکر پاکستانی خزانے کے پیٹ کو بھرنے کے لئے شبانہ روز کاوشوں میں مصروف عمل دیکھائی دیتی ہے عین دوسری طرف اسی خزانے کے مصرف کے لے وزراء کی لمبی قطاروں میں اضافہ کیا جارہا ہے۔ آج بھی صورتحال بالکل ویسی ہی دیکھائی دیتی ہے جب عمران سرکار بھی اپنی اتحادی جماعتوں کے نہ بند ہونے والے منہ کو بند کرنے کی ناکام کوششوں میں مصروف دیکھائی دیتی تھی اور آئے روز وزراء کو بھرتی کرتی چلی جاتی تھی۔ اس موقع پر پی ٹی آئی اور مسلم لیگ ن کے حمایتی افراد اپنے اپنے راگ الاپتے دیکھائی دیتے تھے مگر ہمارے جیسے دل جلے اُس وقت بھی اپنی بھڑاس نکالتے تھے اور آج بھی اکرم اُداس کے ڈائیلاگ '' فیر کہندے نے بوٹا گالاں کڈا دا اے'' کو گنگنا رہے ہیں۔ ویسے عمران سرکار و شہباز سرکار سے یہ سوال پوچھنا تو ضرور بنتا ہے کہ جن نگینوں کو آپ اپنی کابینہ میں بھرتی کرتے ہیں وہی حضرات چند سالوں میں آپکے مخالفین کی کابینہ کا حصہ کیوں بن جاتے ہیں؟ جیسا کہ سابق وزیراعلی خیبر پختونخواہ و سابق وزیر دفاع جناب پرویز خٹک کبھی عمران خان کے کنٹینر پر خٹک ڈانس کیا کرتے تھے اور آج موصوف اُس سیاسی لیڈر یعنی شہباز شریف کی کابینہ کا حصہ بن گئے جنکو کبھی چور ڈاکو کہہ کر پکارا کرتے تھے۔
دہائیوں کے بعد پاکستان میں چیمپیئن ٹرافی جسے منی ورلڈ کپ بھی کہا جاتا ہے کی صورت میں بین الاقوامی کرکٹ کی واپسی ہوئی، اسکے انعقاد پر دل خوشی سے بھنگڑے ڈال رہا ہے۔ جبکہ پاکستانی کرکٹ ٹیم کی شاندار بے عزتی پروگرام پر پاکستان کا ہر شہری اکرم اُداس بنا ہوا ہے۔ اللہ جانتا ہے کہ بندہ ناچیز نے عرصہ دراز ہی سے پاکستانی کرکٹ کے چھوکڑوں کو دیکھنا چھوڑ دیا ہے۔ اگر ہم نے پاکستانی کرکٹ کو ٹھیک کرنا ہے اور اگر مگر اور تُکوں کے بغیر صف اول کی ٹیم بننا ہے تو کرکٹ کے چھوکڑوں کو پاکستان کے قومی کھیل یعنی ہاکی کے کھلاڑیوں کی طرز پر اوقات میں رکھنا ہوگا حالانکہ ہاکی کے کھلاڑیوں کے ساتھ ہونا والا سلوک بھی کسی ظلم سے کم نہیں ہے۔ بہرحال میری رائے میں جہاں پاکستانی کرکٹرز کا قصور ہے وہیں پر پاکستانی حکام خصوصا کرکٹ بورڑ، میڈیا چینلز اور اشتہارات دینے والی کمپنیاں بھی قصوروار ہیں جو سال کے365 دنوں میں 50 دن سے بھی کم دن کام کرنے والوں کو کروڑوں اربوں روپے سے نہ صرف نوازتے ہیں بلکہ ان نواب زادوں کو سر پر بھی چڑھائے رکھتے ہیں۔ ان شہزادوں کو کروڑوں اربوں روپے نوازنے کی بجائے چند ہزار تنخواہ پر رکھیں پھر دیکھیں یہ کس طرح کام یعنی کھیل پیش کرتے ہیں۔ بصورت دیگر حکام انکو نوازتے رہیں گے اور پاکستانی عوام انکو اکرام اُداس کی طرح داد تحسین پیش کرتے رہیں گے۔
واپس کریں